Pinangenotan san Lokal na Gobyerno nin Daraga, sa paagi nin Daraga Public Market, katabang an Department of Trade and Industry Albay, an Ceremonial Destruction of defective weighing scales nganang aldaw, Oktubre 13, 2025, sa LGU grounds, Daraga, Albay.

Bilang parte san selebrasyon san Consumer Welfare Month, ginibo sa seremonyang yadi an pagraot san mga nakumpiskang depektibong timbangan.

Segun man kay Market Adminstrator Themis Lobete, nasa 187 na timbangan an nakumpiska magpun san Operation Timbangan kundin niraot an mga kumpirmadong depektibo dangan uminagi man sa recalibration an iba na pwede pang ibalik sa mga paratinda.

Dugang pa ni Lobete, regular an sayndang routine inspection san mga timbangan sa public market dangan night market tanganing maasigurar an tama na calibration san ubos na timbangan.

Apwera sadi, obheto nin aktibidad na labanan an mga pandaraya sa merkado, lalo na sa pagamit san tampered o depektibong timbangan, dangan saro yadi sa paagi bilang proteksyon sa mga konsyumer na pirming apektado kan mga pandarayang yadi.

Presenteng nag-atendir didi sina Alkade Victor U. Perete, Ma. Lourdes Pasobillo, Chief Trade Industry Development Specialist (DTI Albay), Alexandro Novora, Senior Trade Industry Development Specialist (DTI Albay), mga opisyal san lokal na gobyerno, dangan iba pang stakeholders.